左右不分

我是一個輕度左右不分的人，從幼稚園學分左右開始，凡有人叫舉左或右手，我必須先想那一隻拿筆（經典的教法），經此翻譯工序之後才可以肯定邊隻打邊隻，所以總是慢人半拍．

及至長大成人駕車載客，遇著要助手席人士帶路，事必囑咐：不能說轉左或轉右，只能說轉你果邊定我果邊，否則頭腦紛亂，恐怕出軌．

除此，近年更思疑這種症候應該有套裝的症候群：即重有若干死穴；例如我自少對Pull 和Push 兩字有學習障礙，對著大門手柄堂堂這兩個大字總有點為難，不知怎樣好，連帶它倆的中文姊妹”拉”和”推”同樣令我很困惑．手懸在半空，硬是賭大細地押下去，無解既，學了千萬次都沒有變乖，而又繼續常常押錯，同度門對唔去．用死力去拉一度輕推就開的門，或調轉．

尚有圖案版的心理puzzle：電梯內那兩個笑笑口的開關掣指示＜＞和>< ,我次次都思前想後，對它們不敢造次．一個人還好，錯了只是又開又關的費你幾秒; 但如果電梯內已有人，然後還有幾位急趕而來，以腳步叫你等埋的一家大細，又企正lift 門前，人人等你hold 住，按一按粒掣（你地個個都知果粒），而我，係手震震咁又博一鋪，按錯咗，真係無地自容，擺明就係個自私精．你諗下，人家走緊埋呢，你重快快關閘? 其實有誰知，我係想開住度門至真．而如果我反應快，發覺唔對路後又即刻開番部lift 門，睇落簡直係雙重可惡, 你話幾寃枉?