2009年4月23日 星期四

Smap 的前途

草剪剛今日鬧單醉酒裸跑新聞，真係陰功，有啲担心Smap 會否到此散Band.

紅了二十年，仍在一線，上晒神枱，早就封咗國民good boys 組合，想壞都無得壞．轉眼五隻仔變埋佬， 之前重傳話五佬會一齊再拍組成以來的第二部電影，估道係中團圓，收唔收爐都好，都是紀念作．而家點收科呢? 不了了之?

雖然Smap作為一個組合，目前都只係得番個Smap x Smap TV show, 不過仍然有個勢． 九七年夜空的那一方唱遍旺角，成為回歸背景音樂，當年開花滿滿的是一地的老翻日劇．一想起回歸，除了臨近D-day之前個幾月大雨，就是他們的夜空和那隻拍得非常好睇的MV, 各具形格的五子，在城市的冬夜，摩天大樓天台上，抵著冷，指向燈海外漆黑的未來．

而收埋自己多年的草剪，終於還是捱不住了．
張貼者： 於
標籤：

8 則留言:

匿名 提到...

哎，雖然我都只係因為木村拓哉至一併睇埋smap，但睇住佢地(當然在互聯網)由14、5歲做到36、7歲，都咪話唔傷感。上次2002(?)年吾郎撞親女警過左骨，今次有冇咁好彩？最弊係俾人映埋上警車個衰樣，好難睇喎。leader中居係遊戲環節曾講過要奇蹟就搵吾郎，睇下吾郎今次可唔可以過d 彩數俾member啦。

事後孔明說句，草剪是五子中最沒鮮明形象的，老是被欺凌似的，印象最深是他扮蝙蝠俠的小丑，簡直入形入格，那股陰森，我直覺是他的反響。有次木村連續輸了，他名正言順向木村擲了2次cream，開心到你相信是發自內心的，當然怕且除了慎吾外，其餘四子都會有同一反應吧。

我最鍾意是他們的「lion heart」，木村2000年宣佈結婚時也說過終於理解此曲歌詞的意思，不過不認不認還需認，上個月韓國的東方神起接受草剪在music station 訪問同時唱了此曲，草剪也不禁說唱得比smap更好。

我睇smapxsmap發覺最過癮的是互隊，五人相識並一起工作超過20年，那是一種怎樣的關係呢？怕且甜酸苦辣都有齊，member彼此相親又相斥，怕且佢地自己都講唔清。2002年攪了個2人輪流對話，中居vs草剪，然後草剪vs吾郎，吾郎vs木村，木村vs慎吾，最後慎吾vs中居。應該冇稿，但很精彩，隱約看到彼此的關係和角色，木村這個攪事份子當然表現精彩，但最突出是中居最後同慎吾講︰對不起，剛才說的都是為這節目所作的謊話，然後慎吾呱呱叫︰我說的可全是真話。嘩，睇到我狂呼頂癮，印象難忘。

而家都唔知講咩好了。

kitty
ps.我個initial係spma，係咪好邪呢？

2009年4月24日 下午4:59
ali 提到...

I think it’s difficult for him to join the legendary SMAP again. Although 草剪 is not the most popular one in SMAP, he did damage his and SMAP’s image totally. I don’t think the group can come back again. U can see Beyond.

2009年4月24日 下午6:04
thousandfalls 提到...

Kitty,
原來你都係smapu fan club 成員．我近年已經無睇SXS,不過對五佬既關係都叫做有啲了解（自以為咋）．Tsuyoshi 同Shingo 係真friend, 其實三友係拍檔．今次阿剛下意識叫悟吾其實係向朋友求助．其實佢雖然係最溫馴果個，不過應該係壓抑得好緊要．木村中居因為紅，所以囂都可以得，亦成為venting out pressure 方式，Shingo 亦夠紅同埋開朗，亦OK,吾郎整體成績落後，亦唔好表達自己，不過”勝”在自信唔夠，就無話要行更前，上次符碌過骨，佢都係以二三線自居就算，平衡番，而阿剛既”一個好人”形象，日本好受落，佢都去過超一線，咁先弊，可高可低，忽下忽落，點算好．

Smap 以偶像組合出身，今日變成國民優等生藝能人，已經係奇蹟，本來過多兩三年，就會係傳奇，不過都係爭半步．阿剛呢次好艱難．

Ali, 我同意你的睇法，只睇阿剛的”好人”形象重有冇最後一份運氣．

2009年4月25日 凌晨12:28
thousandfalls 提到...

"其實三友係拍檔."
錯咗:應該係"其他三友係拍檔".

2009年4月25日 凌晨12:34
匿名 提到...

先更正︰
1. 吾郎單衰0野發生係2001年8月，之後被雪藏5個月，缺席10周年演唱會。
2. member對談應是在2003年12月。

話晒都係傳媒出身，時地人盡量作考證。

今日上網見大口仔在自己節目裡用2分鐘代阿剛向觀眾道歉，果然是「真兄弟」，中間的停頓位讓人動容。有網友分析點解阿剛會令日本人咁大反響，因為他是5子人最平凡兼認真工作，讓普通人最有共鳴。大佬中居聲名狼藉，二佬木村又最我行我素離經叛道，三佬吾郎像貴公子愛享受多於一切，細細佬慎吾像長不大的kidult，惟獨阿剛形象最接近大眾。

謠傳兩大佬非常不滿，因為之前已經warn了他多次不要醉酒鬧事，不過有調查說9成人唔想天團解散喎。當年為幫吾郎舖路02年1月的smapxsmap非常精彩，4子又在演唱會穿了印有吾郎大頭的T恤，那時心想日本人辦事真厲害。真係好想知呢單野點收科。

不過我其實最想睇到有人分析到點解佢地可以紅足20年變成傳奇咁滯，但請不要那些甚麼文化評論學者指手劃腳，我真係會反面出手打人。

kitty san

2009年4月27日 晚上11:44
thousandfalls 提到...

因為五隻野有啲料到,兼勤力.又咁啱,五個唔同款,因為尊尼之前及後啲Groups 都有唔少，但絶少五個五個款（之前重有個森且行係第六款），總有一款啱你（好重要）；而且實力（初頭計）又幾接近，即使木村勁紅，其他幾位都唔輸得蝕，好睇係呢度．全部上到一線．呢下就無幾二個group 做到．
又：對於吾郎之前的描述要修正，佢其實都仍然係一線，不過近尾，佢對唔爭勒．（未致於係二三線，寫大咗，查實我係Goro fan, 唔好問點解．）
呢次，睇呢幾日走勢，Tsuyoshi 應該”mung" 得番．佢近年既”我的生存之道”不死underdog 形象真係好中日本人架．所以同情分大把．睇事務所點玩勒．

2009年4月28日 凌晨12:17
thousandfalls 提到...

話時話，而家點樣係網上睇SXS, e貓比我ar.

2009年4月28日 凌晨12:18
匿名 提到...

冇錯，5子確實係幾努力，想當年佢地1991年出道，第一隻碟銷量驚人差，J家老爺將佢地放逐，拋俾富士高層老友，老友拗俾下面條靚，條靚將佢地放係深宵節目，漸發覺5人真係肯搏，仲會同佢一切度橋攪好多諗頭，最後終於係1996年4月15日有了smapxsmap.

當時從未有偶像歌手可以咁放下手段去攪笑，怕且而家都冇邊班人好似佢地咁多面。我睇過佢地93年參加甚麼天才比拼，要佢地擘磚踢棒，木村做完當場痛到標眼淚，班女評判都忍唔住喊了，最後給他們滿分。多年後木村說︰娛樂圈沒有能與不能的事，只有做與不做的事。原來當年電視台見他們能解決5塊磚，即時加多5塊，5子被迫頂硬上。

俱往已。

kitty

2009年4月28日 下午1:23

張貼留言

訂閱： 張貼留言 (Atom)

追蹤者

標籤