品味第三世界

媽媽以前種下一些植物，長得還可以，一直不知其名．前幾天路過街市旁新開賣盆栽花卉甚麼的小鋪，見到有棵植物跟家裡的某不知名”樹”該是同品種，即時問店主其名，答云”發財樹”．吓，打個突，再問原名呢?大家都叫發財樹，好意頭，買盤返屋企擺吓啦．

想多識草木鳥獸之名的念頭從此可斷．怎地這城的人連丁點好奇心都失去呢?過年那棵黃葫蘆般的果枝叫五代同堂，七彩的花花叫荷包花，還有一朿朿的叫串串金；連以往一直稱為玉蘭的仙人掌科植物今日又改名為富貴乜乜物物．好彩水仙出道得早，否則叫做運財水元寶都有之．究竟還要不要植物科這門學問?有謂這些發達新品種多是隨內地而來，因為他們更重視意頭云云，都有今日，姓社的教番姓資的最緊要搵錢．

當然，目下我們叫了九百幾年的玫瑰，菊花，百合，牡丹，劍蘭，蒲柳，鬱金香和她們的拉丁水蛇春學名同樣風馬牛，不過始終都有或形似或神似的音意譯，或是古籍有載，事出有因的命名，說白些就是少有銅臭，兼且款式味道繁多；不像今時無分尺碼，管你粉黛綠白，賞葉賞花抑或種果，統統都叫旺財．

我問的那植物莖部像椰殼，然後一枝竿由上生，頂部四散開出多綑一組六七塊的傘狀綠葉，哪一忽發緊財?求其你話叫皇帝椰，小雨傘我都收貨啦.

研究意願唔足都算，連丁丁品味或美感要求都嫌無謂，我地的精神生活唔係窮成咁啩?