斷句_阿媽_係女人

其實完全唔想拉任何阿媽落水，因為我愛天下母親（除咗少數），不過見到電視新聞而家最興的”寫作”手法，繼續污染大氣電波，就真係好把火，要搵阿媽助拳．

家陣記者點解寫親”軟新聞”開頭就一定用斷句，其實都唔係句，係詞語：比如天水圍學童表演就會係：化粧(pause)，講英文（pause)，跳舞(pause)，天水圍呢班學生今日．．．之類；救命，你句句hit shot，阿媽係女人，我睇到晒，駛乜講呢?個分幾鐘故仔無其他資料值得講乜?電視的精粹之一係用畫面講故事，如果鏡頭唔夠料，係要寫illustration, 不過係要提綱絜領的點題句子，唔係呢種見碗話碗，兼且未能成句的”描寫"．

而家一句完整句子好難寫咩?分零鐘在電視係好寶貴既，要寫二十句有料野都怕係應有之義啩？呢種斷句寫作無可能收貨．唔該編輯，細既唔識，你地都應該識！